Skema għall-kitba ta' teżi
 

 

Din l-iskema utli ħafna mill-website tal-Università ta' Edge Hill, f'Ormskirk, Lancashire, fir-Renju Unit, tipproponi "Seba' Passi għall-Kitba ta' Teżi." Dawk l-istudenti li jkunu se jagħmlu teżi miegħi jridu jaqraw dawn in-noti u jiddiskutuhom miegħi qabel ma naslu għall-iskema tax-xogħol innifsu li jwassal għall-preżentazzjoni tat-teżi. L-unika tibdila importanti minn din l-iskema proposta mill-Università ta' Edge Hill hija l-użu tal-istil tal-MLA fil-kitba tat-test u n-noti fit-teżi. Għal eżempji aġġornati ta' kif tintuża s-sistema tal-MLA (2008) ara, ngħidu aħna, dan is-sit. Fil-fatt huwa sit (OWL at Purdue University) utli għal ħafna aspetti tar-riċerka u l-kitba.

 

Nipproponi tliet riżorsi oħrajn indispensabbli:

  • Dokument elettroniku: Writing your Dissertation (University of Southampton) http://www.studyskills.soton.ac.uk/studyguides/Writing%20Your%20Dissertation.doc

  • Ktieb fil-Librerija (tal-UOM Junior College, ara l-OPAC): How to write essays, dissertations and theses in literary studies, ta' Nigel Fabb u Alan Durant (Londra:  Longman, 1993). Paġni xii, 146 p., ISBN 0-582-08977-8.

  • Teżisti verżjoni iktar riċenti ta' dan il-ktieb: How to Write Essays and Dissertations: A Guide for English Literature Students ta' Nigel Fabb u Alan Durant (Londra: Longman, 2005). Paġni 184, ISBN-10: 0582784557 / ISBN-13: 9780582784550. Ixtruh mill-ħwienet tal-kotba f'Malta jew żuru The Book Depository biex taraw xi paġni mill-ktieb jew tixtruh (ma tħallsux tal-pustaġġ).

Ninsisti wkoll mal-istudenti li jkunu qegħdin jagħmlu t-teżi miegħi li l-lingwa tagħhom tkun trid lingwa akkademika li tixraq lil dan il-qasam u l-livell ta' riċerka u li l-lingwa m'għandhiex tkun sessista. Għaldaqstant, "il-qarrejja" (fil-plural) u mhux "il-qarrej;" "il-kittieba" u mhux "l-awtur" jew "il-kittieb" jekk tkun qed tirreferi għall-kittieba inġenerali.

 

Ara l-gwida għall-istil għat-teżijiet magħmulin fi ħdan il-Fakultà tal-Arti hawnhekk: Dissertation Style Sheet

 

Normalment it-teżijiet fid-Dipartiment tal-Malta fil-livell tal-Baċellerat jiġu ppreżentati f'Mejju (fl-aħħar sens tal-kors tal-Baċellerat bl-Unuri). Għaldaqstant, jien nistenna li l-istudenti li jkunu qed jagħmlu t-teżi miegħi jimxu ma' din l-iskema ta' xogħol:

 

Skema tax-xogħol għall-kitba ta' teżi fil-kors tal-BA bl-Unuri

 

Teżi normalment ikollha kapitlu introduttiv (ħarsa kritika/analitika lejn dak li nkiteb dwar is-suġġett minn ħaddieħor), tliet kapitli li jiffurmaw il-qalba tar-riċerka, u kapitlu konklużiv. Ikun hemm ukoll biblijografija.

 

Fit-tieni sena Xogħol tal-istudenti li jkunu qed jiktbu t-teżi
   
Marzu Diskussjoni dwar is-suġġett tat-teżi li tintrabat ma' qari ta' testi letterarji Maltin u testi kritiċi u teoriċi miktubin bil-Malti, bl-Ingliż u possibilment b'lingwi oħrajn, li jsawru jew "jiffurmaw" il-qari tat-testi letterarji.
April - Mejju Kitba ta' deskrizzjoni ta' paragrafu jew ftit paragrafi tar-riċerka li tkun se ssir fit-teżi bbażata fuq il-qari li jkun sar. Diskussjoni tal-iskema tax-xogħol li jwassal għall-preżentazzjoni tat-teżi lesta f'Mejju tat-tielet sena tal-kors.
Ġunju Tfassil tal-kapitli. Dan il-pjan jista' jinbidel hi u tinkiteb it-teżi iżda importanti li jkun sar biex l-istudenti (u jien bħala t-tutur) ikollhom idea tajba ta' kif se jqassmu l-qari u l-kitba tagħhom u liema oqsma jridu jagħfsu fuqhom l-aktar.
Settembru Sottomissjoni tal-ewwel kapitlu tat-teżi, li mhux bilfors ikun fil-fatt L-Ewwel kapitlu. Minn hawn 'il quddiem, però, ikun aħjar jekk l-istudenti jimxu pass pass mal-kapitli tat-teżi.
   
Fit-tielet sena Xogħol tal-istudenti li jkunu qed jiktbu t-teżi
   
Ottubru Korrezzjonijiet u tħejjija tal-kapitli l-oħrajn.
Novembru Sottomissjoni tat-tieni kapitlu tat-teżi.
Diċembru Korrezzjonijiet u tħejjija tal-kapitli l-oħrajn.
Jannar Sottomissjoni tat-tielet kapitlu tat-teżi.
Frar Korrezzjonijiet u tħejjija tal-kapitli l-oħrajn.
Marzu Sottomissjoni tal-kapitlu introduttiv u konklussiv
April Korrezzjonijiet tal-aħħar
Mejju Preżentazzjoni tat-teżi
   

 

Għal aktar tagħrif:

Ara r-Regoli tal-korsijiet tal-BA u l-MA fl-Università ta' Malta